O presidente da Xunta, Emilio Pérez Touriño, anunciou onte a data dos comicios galegos. Segundo apuntou o socialista no último Pleno do Parlamento, os galegos elixirán o seu Goberno o vindeiro 1 de marzo. Con este calendario, a campaña electoral arrincará en Galiza o 13 de febreiro, oficialmente ás 00.00 horas do venres e concluirá dúas semanas despois, o venres día 27, de forma que a última semana na que os políticos poden pedir o voto aos galegos coincidirá co Entroido. Entre o 31 de decembro e o 6 de xaneiro, Touriño deberá asinar o decreto de convocatoria destes comicios.

Emilio Pérez Touriño comezou onte a súa intervención no Parlamento co anuncio da data, logo de ser acusado polo líder da oposición de presidir unha lexislatura cunha herdanza de "decadencia económica" e de "descontento". O socialista respondeulle a Feixóo que estes tres anos e medio de lexislatura foron dunha Galiza que "avanza e progresa". O popular insistiu en que "todo" o país "preguntouse quen gobernos nestes catro anos. "Galiza non pode entender que o presidente non despache coa metade do Goberno porque era nacionalista", recriminoulle. Feixóo tamén aproveitou para ironizar con que "non lle respecta nin o vicepresidente do seu Executivo".

O vicepresidente da Xunta e portavoz nacional do BNG, Anxo Quintana, asegurou que a formación que lidera enfróntase ás eleccións de marzo como unha "forza política en ascenso" e pediulles a "confianza" aos cidadáns para continuar o seu proxecto na vindeira lexislatura. O portavoz do BNG apuntou que o Bloque "prometeu unha revolución tranquila" nesta lexislatura e "que Galiza sexa respectada no Estado". A ese respecto, sinalou que a súa formación política puxo en marcha "cambios estruturais importantes" naquelas áreas nas que goberna, e concluíu que "agora Galiza decide en Madrid". Quintana asegurou que a sociedade galega "ve un BNG que cumpre, que fai política para a xente e que lle dá estabilidade ao Goberno". "Imos enfrontar as eleccións do 1 de marzo coa máxima ilusión e sabedores de que estamos nun bo momento político", engadiu.

Punto de inflexión, en xuño do 2005
O punto de inflexión na política do país tiña lugar o 19 de xuño de 2005, cando por un escano o PPdeG perdía a maioría absoluta. Era entón cando, despois de 16 anos, Manuel Fraga cedíalle o mando de Galiza ao bipartito formado polo PSdeG e polo BNG. Así, nesta última lexislatura, os socialistas, con 25 deputados, e os nacionalistas, con 13, sumaban un escano máis que os populares. Daquela, os socios de Goberno acordaban que o PSdeG xestionaría oito consellarías e a presidencia, mentres que o BNG dirixiría catro departamentos e a vicepresidencia.

Máis 2,6 millóns, chamados ás urnas
Uns 30.000 electores veñen engordar as listas de cara ás eleccións galegas respecto aos comicios do 2005. Así, máis de 2,6 millóns de galegos poderán exercer o seu dereito ao voto e marzo. Segundo os datos da Oficina do Censo Electoral, a 1 de novembro de 2008, 2.637.601 galegos están chamados ás urnas. Desa cifra 2,3 millóns atópanse en Galiza e, o resto, máis de 334.000, no estranxeiro. Desta forma, e se se comparan estas cifras coas eleccións de 2005, 30.092 novos electores poderían votar o 1 de marzo e, destes novos votantes, a maior parte son residentes no estranxeiro. A provincia con maior número de censados é A Coruña, con 1.067.815 censados; séguelle Pontevedra con 869.927, Ourense con 324.277, e Lugo con 375.582.


Desde os primeiros comicios autonómicos, en 1981, pasaron 27 anos e un total de catro presidentes pola Xunta -Xerardo Fernández Albor, Fernando González Laxe, Manuel Fraga e Emilio Pérez Touriño-. Case tres décadas reduciron o número de partidos no arco parlamentario galego e, fronte ás seis forzas que lograron representación nas primeiras autonómicas, na actualidade só existen tres -PPdeG, PSDEG e BNG.