"Gallego en el sentido máis peyorativo de la palabra". Así lle respondía Rosa Díez ao xornalista Iñaki Gabilondo logo de que este lle pedise que definise a José Luis Rodríguez Zapatero cunha palabra. Con esta, xa son dúas -como mínimo- as veces nas que a deputada ultraespañolista Rosa Díez emprega a verba "gallego" cunha carga xenófoba e cun odio visceral cara a Galiza e cara ao pobo galego. A actitude da portavoz de UpyD reflicte a degradación que sofre a política española. A resposta racista que lle deu Díez a Gabilondo é impropia de alguén que ocupa un cargo de responsabilidade pública.
Pouco despois de saír á luz a entrevista de Gabilondo a Díez, os grupos políticos galegos censuraron a súa actitude e formacións como o BNG pediron a súa reprobación. A ultraespañolista tamén recibiu críticas do PPdeG. Porén, é coñecida a boa relación da portavoz de UpyD co sector máis anti galego dos populares, cos que comparte a liña ideolóxica. Hai apenas un ano, Rosa Díez manifestábase polas rúas de Compostela contra a nosa lingua acompañada por cargos do PP como a vicepresidenta segunda do Congreso, Ana Pastor, o deputado no Parlamento de Galiza Ignacio López Chávez, ou o actual conselleiro de Presidencia, Alfonso Rueda.
A portavoz do partido ultraespañolista, no canto de desculparse polos insultos aos galegos, aumentou a polémica ao increpar os que se ofenderon. Para UPyD, o significado "coloquial" do xentilicio de Galiza "en sentido pexorativo" sería o de alguén que evita comprometerse. O partido de Rosa Díez aduce que o uso de "gallego" no sentido "pexorativo" é similar a expresións como "traballar coma un negro" ou "chulo coma un madrileño". De aí que considere que "ofenderse por isto é unha mostra de intolerancia, complexo de inferioridade ou perturbación nacionalista".
Os tres grupos parlamentares -PP, PSOE e BNG- estudan agora como reprobar os insultos de Rosa Díez aos galegos. Polo de agora, o Parlamento de Galiza non chegou a un acordo, xa que os populares pretenden que se omita o nome da portavoz de UpyD na reprobación institucional. Ao coñecer a intención da Cámara galega para denunciar a súa conduta, Rosa Díez sinalou que "demostra que en España hai demasiado candidato a censor solto".
Arcadi Espada apoia a Díez
Unha semana despois da polémica xurdida ao redor da actitude racista de Díez, o analista catalán Arcadi Espada fixo súas as declaracións da portavoz de UpyD no espazo radiofónico presentado pola xornalista galega Xulia Otero. Para Espada, as críticas a Díez son unha proba de que tanto os medios de comunicación e os políticos que a censuraron son "estúpidos, ignorantes, aldeáns, cantonais e provincianos". ??O comentarista -membro de organizacións españolistas como Basta Ya e promotor da plataforma cívica que deu lugar á creación do partido Ciudadanos-Partido de la Ciudadanía- engadiu, trátase da "proba de que neste país se fraccionou a intelixencia do cero ao cero".
O catalán tamén sinalou que Díez "estivo estupenda" e "demostrou por que algúns lle temos simpatía política e persoal".?Xulia Otero, ao contrario que Gabilondo, enfrontouse en directo ao seu colaborador e descualificou as súas verbas "ofensivas". Acusouno ademais de ser soberbio e de non ter valentía para rectificar e pedir perdón.
Non só Díez ou Espada insultan os galegos co emprego xenófobo do noso xentilicio. O dicionario da Real Academia Española aínda contén definicións de raíz xenófoba, pexorativa e vexatoria do noso xentilicio. Malia as reiteradas peticións parlamentares do BNG, a RAE inclúe "gallego" como "tonto" ou "tartamudo". Até ben entrada a segunda metade do século XX, a institución da lingua española non suprimiu a entrada de "gallego" como sinónimo de "bruto". Na actualidade "gallego" fica definido como lingua do noso país na sétima aceptación da verba.
Asistimos unha vez máis a unha mostra do vilipendio que sofren todos os nacionalistas sen a mínima consideración aos seus dereitos. Que acontecería se fose un galego quen empregase o termo "español" como sinónimo de "imperialista" ou ignorante?